^^دموع الفرح^^ بقلمي

بسم الله ورحمة الله وبركاته..
بينما كان الوالد احمد يقلب الجريده دخل عبدالعزيز ومعه نواف اخوه الصغير وكان توه جايبه من المدرسه ..
عبدالعزيز: السلام عليكم
الوالد(احمد): وعليكم السلااام , هلا وغلا , اخبار الجامعه ؟؟
عبدالعزيز: الحمد لله تمااام
أحمد: واخبار المدرسه نواف ؟
نواف: تسلم عليك يبه خخخخخخخخـ
_في هذا الوقت تدخل الوالده (الجوهره)..
الجوهره: هلا والله بالطش والرش.
عبدالعزيز: هلا بك يمه وش اخباارك؟
الجوهره: الحمد لله بخيير
- شوي قام عبدالعزيز وكان هو من النووع اللي يحب قعده النت يعني خلووه عند النت وانسووه.
اول مادخل للماسن لقى عنده كم رساله بس تفاجأ انه مافيه عنده احد اون لاين!! وكان ماايحب يدخل منتدياات ولا شي زي كذا.
فبدا يفتح الرسايل ولقى ايميل واصله من صديقة وهذا الولد 24 ساعه يكلم بنات فما استغرب لما شاف الايميل ملياان ايميلات بنات.. شوي فكر قال وش وراي مو انا قاعد طفشان خليني اضيف واحد من الايميلات اغير جو شوي واتعرف على ثقافات جديده( امحق ثقافات) .. لقى ايميل "الطخمه" جذبه هذا الاسم وكان يقول بنفسه نفسي اشوف هذي البنت يعني ايش الوثوق هذا ياشييخ !! وطبعا بدون تردد اضافها ..
***
في الطرف الثاني من الرياض كانت هنادي بغرفتها البنفسجيه والديكور الكيوووت قاعده على الاب توب وتكلم اربع بنات بنفس الوقت ( ماعندها وقت ذي البنت ) وهي متحمسه بنص السواليف ووحده تشتكي لها ووحده تقول لها بااركي لي الا جتها اضاافه من عزووز طبعا كانت هنادي من النوع الملقوف وبقووه بعد .. فقبلت الدعووه تبغى تشووف وش سالفته عزوز هذا .. ومن وين جاايب ايميلها !!!
ما أمدا البنت حطت اوافق الا طلع لها
عزوز: هلا بالطخمه
هنو: هلا بك , مين معي ؟؟
عزوز: معك عبدالعزيز الاطخم خخخخخخخخخخخخ
هنو: اقول بلا ثقالت دم وقوول لي من وين جايب ايميلي ؟ ووش تبي بالظبط؟
عزوز: طيب مو اول اسالك وش اخبارك ووش اسمك, ماعندك وقت يعني !!
هنو: ايه انا بيزنس ويمن وش عندك
عزوز: اعصاابك اعصاابك, انا وش بسوي لك يعني اذا كلمتك.. تراني ماراح اكلك .. شبعان الحمد لله توني متعشي..
هنو: طيب لحد الحين ماقلت لي من وين جايب ايميلي؟؟
عزوز: يعني اذا قلت لك راح يفرق؟
هنو: ايه طبعا يفرق كثير
عزوز: طيب ياطويلة العمر لقيته بايميل عندي وااصلني من واحد من اخويااي وشكل بنت مرسلته له لاني مليان ايميلات بنات
هنو: اهااا كذا اجل
-المهم بعد كذاا فلوها وقعدوا يسولفون واخذوا على بعض وصاروا تقريبا كل يوم يسولفووون ويقولون لبعض كل شي يصير لهم واحيان بعد يستشيرون بعض ..
***
- في صباح يوم مشرق دخلت هدى على اختها هنادي على الساعه 11 الصباح طبعا 11 بالنسبه لهنادي عز الصبااح
هدى: يالله هنادي قومي عمي مقرن ومرته بيجون يتغدون عندنا
هنادي: طيب انا وش علي منهم ( الاخلاق زفت).. اطلعي وصكري الباب وراك
هدى: لا امي تقول قومي البسي بتتغدين معنا
هنادي: خلاص طيب الحين بقوم.. الا اقول متعب بيجي؟؟
هدى: ايه نجلا تقول انهم كلهم بيجون ( الحين نجلا اخت متعب ونجلا 24 ساعه مع هدى إما على التليفون ولا عند بعض بما ان بيوتهم قريبه لبعض)
هنادي: اجل انا وش ينزلني ولا تبوني اكل وانا تغطيه !! ( متعب عمره 22 وهنادي 18)
هدى: لا امي تقول ان ابوي وعمي ومتعب بيتغدون بلحالهم
هنادي: اها خلاص طيب شوي وانزل..
-عند هذي النقطه لازم اقول لكم وش قصدة متعب هذااا
متعب ياطويلين العمر يحب هنادي وميت عليها واذا سمع اسمها يفز قلبه.. وفي سنه من السنين لما كانوا صغار وكان عمر متعب 18 بين "بشده على الياء" لهنادي انه يحبها بس للأسف هي ماكانت تبادله هذا الشعور فهي كانت تعتبره اخوها الكبيير .. ومع مرور السنين توقعت انه خلاص نسى حبها وانه اصلا الحب كانت حب مرااهقه فقط لا اكثر ولا اقل .. بس ماكانت تدري ان حبها يزيد بقلبه كل يوم وكل دقييقه....
***
هنادي قعدت تلبس وطبعا لازم اللبس ساعه ماينفع احد يشوفها بدون مكياج وحركتات.. الا شوي تدخل عليها اختها هدى وتقول لها ..
هدى: يالله ياعمتي ترا حطينا الغدا
هنادي: يالله هذاني جيت شوي بس
هدى: طيب ترانا جالسين بالخيمه لأن الرجال جلسوا بالسفره .. طيييب!!
هنادي: طيب خلاص روحي ياللإزعاج
بعدها بعشر دقايق نزلت تحت وكان لازم تمر من الصاله الي جنب السفره.. وهي ماشيه مقلعه تخاف ولد عمها يشوفها وماكان ودها تروح تجيب غطا فهنادي كانت معروفه بالعجز المزمن.. وهي كانت تمشي بكل رشاقه ومن اللقافه اللي سبق ان ذكرتها انها صفه من صفاتها .. كانت مطيره عيونها على السفره اللي كانوا الرجال جالسين فيها وماكانت قاعده تناظر قدامها .. وبدون مااتحس الا هي مصطدمه بجسم غرييب!!! وتناظر قدامها الا ولد عمها متعب وكااان ودها بهذيك اللحظه تنشق الارض وتبلعها ..
ومتعب قعد يتنحنح وهي بقلبها تقوول لا بدري يااشييخ توك تبين لي انك قدامي .. وبحركه رشيقه هع هع قدرت تسحب نفسها من الموقف المحرج وتطلع براا .. طبعا متعب كان في اسعد لحظات حيااته .. شاف حبيبته ولا بعد صدم فيها هع هع هع ..
***
زي ماذكرت اول عزوز وهنو دائما يسولفون على الماسن ومافيه حدث بحياتها ولا حياته مايقولونه لبعض .. فبعد ماراحوا الناس من بيتهم اتجهت الى النت عشان تقول له وش صار لها اليوم..
واول مادخلت للماسن الا لقته قدامها وعاد قعدت تقول له السالفه من اولها لأخرها وهي ميته ضحك. وتقول له ولد عمي هذا بالذات مررره فشله منه
عزوز: ليه وش معنى .... تحبييته؟
هنو: لا وش احبه .. لا احبه ولا شيء
عزوز: اجل ليش هو بالذات؟
هنو: صراحه هو كان يحبني يوم كنت صغيره يعني حركات مراهقه
عزوز: اهاااا وبس يعني انتي ماكنتي تحبينه؟
هنو: لا بالعكس اعتبره زي اخوي
- بعد صمت دام لمده دقيقه!!
هنو: تصدق عاد .. بديت احس باحساس اللي يحب والطرف الثاني مو معطيه وجه.
عزوز: افا .. ليه توك تحسين فيه؟
هنو: لا مو السالفه كذا انت مافهمتني ( هنا كانت هنادي تحاول تلمح له انها تحبه, بس عزوز كان يعتبرها اخته الصغيره فقط لا غير)
عزوز: طيب يافهيمه فهميني..
هنو: لا لا خلاص غير الموضوع
عزوز: على راحتك
- فعلا هنادي في وقتها كانت تحس باحساس الحب من طرف واحد وتوها تبدأ تفهم اغاني الحب والاشعار اللي كانت بس تقراها للتسليه.. توها تبدأ تحس بكل كلمه يكتبها الشاعر...
لكن للأسف كان عبدالعزيز ماعنده أي خبر ولا فكر حتى انه يحبها في يوم من الايام ..

***

بكمل اذا شفت ردووودكم

تحمست تكفين كمل وش صار بعد كذا الله يعافيك كملي

اوكييييييييييكب كملها على الاخر

لأني بساافر Smile

***

-في يوم من الايام كان متعب توه راجع من الجامعه الا دق جواله ويشووف مين طلع اخته نجلاء .. رد عليها متعب: هلا
نجلا: السلام عليكم
متعب: وعليكم السلااام
نجلاء: وش اخباارك؟
متعب: تماام وانتي؟
نجلاء: الحمد لله تمام
متعب: هااه وش بغيتي ( توه راجع من الجامعه وماله خلق سوااليف ومدري ايش)
نجلاء: يااخوي العزيز انا الحين ببيت عمي سلمان ( بيت هنادي وهدى) وابي احد يرجعني للبيت ولا لقيت احد يوصلني..
- طبعا في هذي اللحظه انقلب وجه متعب واستاسع صدره ونسى التعب اللي كان فيه
متعب: طيب يالله هذاني جاي
نجلاء: وش فيك اليووم؟؟ لا لا اكيد فيك شي
متعب: يعني ماتبيني امرك ( باستهتار)
نجلاء: لا لا مو قصدي خخخخخخخخخـ بس يعني غريبه ..
متعب: اخلصي .. تبين شي ثاني هذاني بجييك الحين
نجلاء: سلامتك .. مع السلامه
- متعب في هذا الوقت محد قده بس يوم فكر فيها شوي الحين هو بيوقف عند باب البيت لأنه بس يبي يااخذ اخته يعني مارااح يدخل جوا ولا راح يشوف هنادي طيب وش يستفييد يعني؟؟؟
وطوول الطريق وهو يفكر حتى انه فكر انه يدخل يسلم على عمه ( مسوي صله رحم) يعني يمكن بالصدفه يشوفها !! واخر شي قال لا خلاص برووح اخذ نجلاء عند الباب وان شاء الله انها بتكون تطلع ولا توها راجعه ولا أي شي.. واخيرا وصل لبيت عمه ودق على اخته وقال لها تطلع لاحظتوا انه ماادق قبل لا يوصل لاااااااااا يوم وقف عند باب البيت دق هع هع
عشان يطول اكثر خخخخخخخخخخخخخخخخخخخخ
-وطول الوقت وهو يناظر يمين يساار يدور احد بس للأسف مالقى احد وركبت نجلاء ومشواا
متعب: هاااه نجوولتي .. وش سويتي عند هدى؟؟
نجلاء: ابد سواليف وونساه
متعب: اهاااا .. ووش اخبارهم
نجلاء: الحمد لله كلهم بخير
متعب: ايييه .. طيب مين شفتي عندهم؟
نجلاء: انت وش عندك؟؟ قاعد تستجوبني!! واذا تبي تعرف شي معين قوول لا تدوخني
متعب: ياامي بس اسأل عن عمي واهله فيها شي .. وبعدين لا تطولين لساانك لاا اقصه لك..!
***
مرت ثلاث ايام وماكان عبدالعزيز يدخل النت ولا يرد على الايميلات اللي كانت ترسله هنادي .. وبما انه عبدالعزيز يدخل كل يوم للنت حتى بالاختبارات .. انشغلت هنادي عليه وخافت لا يصير فيه شي !! ولو انه صار فيه شي كيف بتعرف صلتها الوحيده هي الماسن ..
فكانت كل يوم ترسل له ايميل وثالث يوم ارسلت له رسالتين .. كانت بتموت وتعرف وش فيه؟
بهذا الوقت كان عبدالعزيز مريض وماله خلق يدخل للنت وهو ماعطاها خبر لأنه ماكان يدري انها بتفقده لهذي الدرجه!!
ولما تحسن حالته شوي ودخل لإيميله لقى 4 رسايل منها وكل واحد فيه كلام اكثر من الثاني .. اول ايميل" وينك عزووز اشوفك اليوم مادخلت للنت لا يكون صاير فيك شي؟؟ طمني عليك .. هنوو"
إلا اخر ايميل " حياتي وينك اشتقت لك وماني قادره اشيلك من راسي بس افكر فييك .. خاايفه يصير فييك شي اول مره تسويها وماتدخل النت 3 ايام .. هنو"
يوم قرا الايميلات بدا يربط الكلام ببعض .. الكلام اللي قالته اول عن الحب من طرف واحد الى رسايل الشوق اللي مرسلتها له..
فكانت صدمه حياته هنادي تحبه وهو ماكان داري عنها .. في هذا الوقت ماكان يدري ايش يسوي ولا كيف يوصل لها المعلومه وعلى طوول جا في باله اخووه خالد
خالد عمره 31 وقريب بيتزووج وهو كان الشخص اللي يستشيره عبدالعزيز في كل شي
فعلى طوول دق عليه ..
عبدالعزيز: السلام عليكم
خالد: وعليكم السلام
عزوز: هلا خلوود.. اخباارك؟؟
خالد: والله تماام التمااام وانت؟؟
عزوز: الحمد لله بخيير
خالد: وش عندك دااق؟؟
عزوز: يعني اناا ماادق الا اذا بغيت شي!!
خالد: صراحه هذا اللي اشوفه
عزوز: لا حراام عليك انا ادق اسلم احيااااان
خالد: ماعلينا .. قوول وش عندك؟
عزوز: بغيت استشيرك بسالفة بنت ..
خالد: وانت ماتترك هذي السوالف .. ماامليت
عزوز: يااخي وش فيهااااا
خالد: طيب قووول الساالفه .. ولا تدري اناا عندي شوية شغل اخلصهم وادق عليك وتقوول لي على روااق وش قلت؟؟
عزوز: طيب بس عااد لا تتأخر ولا تسحب علي طييييب
خالد: ايه طيب ان شاء الله
عزوز: مع السلامه
- في هذا الوقت دخل عزوز للماسن وعطى هنادي بلوك ماكان وده يكلمها لحد ماايقول له اخووه خالد وش يسوي ..
بعدها بساعه دق خالد على عبدالعزيز عشان يكلمه عن الموضووع
خالد: الوو
عبدالعزيز: هلا والله
خالد: ايوه قوول السالفه من اولها لأخرهاا اناا مرووق لك
عبدالعزيز: طيب .. وقال له السالفه كلها
خالد: اهاا كذا اجل
عبدالعزيز:ايه , طيب وش الحل؟؟
خالد: شووف انت مالك دخل ولا تحط اللوم عليك , محد قال لها تحبك .. يعني بلوك وخلصنا
عبالعزيز: ايه ادري , بس هي حبووبه ومرره استانس وانا اسولف معها وماودي ان العلاقه اللي بيننا تصير علاقه حب .. ابغى ترجع زي اول !!
خالد: هي شكلها من زمان تحبك
عبدالعزيز: ايه شكلها بس انا ماابي كذاا .. ياخي انا اعزها واغليها بس مااحبها انا اعتبرها اختي ..
خالد: طيب ليه ماتكلمها على رواقه وتفهمها كلمه كلمه .. قول لها اني اناا ماافكر بزواج ولا شي بس صداقتي فيك ماودي افقدها .. وشووف رد فعلها
عبدالعزيز: ايه خلاص بشوووف .. هي الحين موجوده بكلمها..
خالد: طيب وقول لي وش يصير معك
عبدالعزيز: ان شاء الله .. مع السلامه

***
في هذا الوقت شال البلوك اللي حااطه عليها ويووم جا بيكلمها طلعت له
هنو: هلا والله وغلا
عزوز: هلا بك وش اخبارك؟
هنو: انت ماعليك من اخبااري انت وش اخبارك وينك اشغلتني
عزوز: بسم الله .. شوي شوي يابنت الناس
هنو: عاد وش اسوي .. اختفيت مره وحده وانت مو من عادتك تسوي هذي الحركه
عزوز: معليش تعبت شوووي وماكنت اقدر ادخل النت و ماالي خلق ابداا ..
هنو: يااعمرررررررري .. سلامتك والله انشغلت مرره عليك وارسلت لك مليون ايميل
عزوز: ايه شفتهم .. وزين انك جبتي طاريهم عشان انا ابغى اكلمك عنهم
هنو: لا يكون بس ازعجتك .. مرره مرره سووري
عزوز: لا مو على كذاا
هنو: قول وش عندك
عزوز: طيب يابنت الحلال شوي شوي علي خليني اعرف اتكلم
هنو: خلاص طيب بسكت
عزوز: شوفي انا بقول لك شي .. العلاقه اللي بيننا الحين مافيه احلى منها .. ضحك ووناسه ووساعة صدر .. وانا مره احب اجلس معك واسوولف .. واحسك الاخت اللي ماجابتها امي .
-هنا هنادي منفجعه وماتدري وش قصده من كلامه ولا تدري وش تقول " في حالة صدمه "
عزوز: وانا حسيت من رسايلك ان فيها كلام حب وشووق ومدري ايش وانا صراحه ماودي العلاقه اللي بيننا تتحول لحب لاني ادري اني مارااح اتزوج قريب واني اصلا لو ابي اتزوج بخلي امي تدور لي وماراح يكون زواجي عن طريق النت
هنادي: بس
عزوز: اصبري خل اكمل .. وانا من كثر مااعزك واغليك ماودي العب براسك بكلام حب زي مايسوون الشباب بالنت وانا اخاف عليك اكثر من خووف اخوك عليك..
هنادي: انا ماعندي اخوو
عزوز: انا اعتقد فهمتي مغزى كلامي
هنادي: صراحه انا مرره منصدمه من كلامك وماتوقعت ردة فعلك
عزوز: بس لا تنسين انا ودي نبقى اخوان .. وش قلتي
هنادي: طيب معليش انا في حالة صدمه وابغى اقعد شوي بلحاالي .. اشوفك بعدين
عزوز: خلاص اللي يريحك .. بس فكري بكلامي زيييين
هنادي: بااي
عزوز: " وهو يدري ان الكلام ابدا ماعجبها" بااي يااغلى اخت " يبغى يلطف الجو شوي"
- حس انه ارتاح شوي بعد ماطلع اللي بقلبه وراح كلم خالد عشان يقول له وش صاار..
***
دخلت هنادي النت بعد يوم من الكلام اللي صار بينها وبين عبدالعزيز. وفي هذا الوقت هي قررت بينها وبين نفسها انها بتقوى على نفسها وعلى قلبها وبتنسى نفسها حبه .. ودخلت للنت ودها تسولف معاااه
عزوز: هلا والله بالطش والرش
هنو: هلا بك وش اخباارك
عزوز: تمام التمام .. انتي وش اخبارك
هنو: الحمد لله بخيير " ودها تخلص من الموضووع" شووف انا فكرت بالموضووع وخلاص ابي نرجع زي اووول
عزوز: حلوووو , مو كذا احسن بلا عوار راس وعوار قلب
هنو: ههههههههههههه والله احس من زماااان عن خفة دمك
عزوز: هع هع المهم وش اخبااارك ووش علووومك وش مسويه بالدنيا
هنو: الحمد لله عاايشه
عزوز: الحمد لله .. طيب ايش اخر الاحدااث .. انا اعرفك ماتجييبني الا بقصه صاايره لك!!
هنو: هههههههههههههههههههـ .... مممممممممممممم طيب بقول لك وحده
عزوز: قووولي
هنو:عزمنا عمي عمر قبل امس ببيته عشان بيورينا بيته الجديد
- هنا عزووز طااح قلبه .. كان هو معزووم على بيت عمه بنفس اليوم ولنفس السبب وشووي استوعب انه عنده بنت عم اسمها هادي وانه عنده ولد عم اسمه متعب...
وشووي بعد استوعب ان البنت اللي يكملها كل هذي الفتره هي بنت عمه وماااعرف وش يقوول ونسى سالفتها اللي قاعده تقوولها وقاال لها برب وهي بنص السالفه مااعرف وش يقووول ولا وش يسوووووووووي..
كاان في حالة صدمه ويقووله بقلبه" سبحان الله الحين انا مااضفتك الا هذا الايميل واخر شي تطلع بنت عمي مو معقوووول ولا بعد انا تقريبا اعرف كل شي عنها ولا حسيت انها تقرب لي !!"
ورجع لها ...
عزوز: مرره اسف قطعت كلامك بس امي ناادرتني
هنو: لا عادي وش دعووه
عزوز: ايووه كملي وش كنتي تقولين " بعد مااخذ نفس عميق"
هنو: ايوه .. واقوول لك .. وكملت السالفه وهو بعد كمل معها سوالف وحس انه ارتاح لها اكثر يوم عرف انها تقرب له.. ومابغى انه يقول لها عشاان يخاف انه ممكن تقطع علاقتها معه او انه تستحي منه ولا تصير تمون عليه زي الحين..
***
كانت العائله كلها تجتمع اسبوع ورا اسبوع باستراحه وكان عزوز منتظر هذا اليوم بفارغ الصبر من بعد مادرا انها تقرب له.. واول مادخل للاستراحه وهو يناظر يمين ويسار
<<< يدور هنادي يحس انه يمون بقووه ووده يروح يسلم عليها خخخخخخخخخخخ
ودخل عند الرجال وسلم عليهم وشووي قعد جنب متعب بما انه اقرب واحد له عمراا وبعد لأنه متذكر كلام هنادي وراح يترزز عنده وده انه يدري هو صدق كاان يحبها وهل هو يحبها لحد الحين ؟؟؟
وخلص اليوم ومتعب ماقال له شي فقرر عزوز انه يعزمه بالقهوه عشان يمكن يفظفظ له هناك واتفقوا انهم بكرا بيجتمعون
تم الموضووع وقعدوا يسولفون عن النت والبنات وجا ولله الحمد طاري هنادي
جا قال متعب: هذي البنت كل يوم احبها اكثر..
"طير عيونه عزوز"
عزوز: ياحركات ياهووه .. وش عنده العاشق الولهان
متعب: " يضحك وهو مستحي" ياخي وش اسوي مو بيدي
عبدالعزيز: اها اجل كذاااااا
متعب: خلاص غير الموضوووع
وغيورا الموضووع وكملوا السواالييف
***
بعد القهوه رجع عزوز للبيت ودخل النت ووهو وده يقول لهنادي ان متعب ميت عليها بس بنفس الوقت مايبغاها تدري انه يقرب لها..
عزوز: سلم لم
هنو: هلا وغلا .. عليكم السلام
عزوز: وش اخبارك؟
هنو: تمام وانت
عزوز: الحمد لله
قعدوا يسولفون شوي .. وحب عزوز انه يجيب طاري الحب
عزوز: تدرين اعرف واحد من اخويااائي يحب وحده تقرب له وميت عليها وهي بالاول ماكانت تحبه بس بعد فتره حبته وقريب بيتزوجون ان شاء الله
هنو: يااااي مررره حلووو
عزوز: وفيه واحد يقرب لي يحب وحده وميت فيها وهي ماتدري عن السالفه وهو من النوع الخجوول وماعرف يوصل لها المعلومه
هنو: يووووه مسكين .. هذا يكسر الخاطر
عزوز: ايه وش يسوي ترااه هو يسالني قال لي وش رايك وش اسوي ولا عرفت وش اقول له..
هنو: مممممم بصراحه مدري وش اقول لك بس يعتمد على اعمارهم وعلى اشياء كثيره
عزوز: هم تقريبا بأول العشرينات
هنو: اهاا .. اجل ليه ماايخطبها وتكون الخطبه تطول مداامهم لسى صغار يعني تقعد سنتين ثلاثه..
عزوز: والله فكره .. خلاص بقول له مشكوره
هنو: ولوو مابيننا هالكلام
وبعد هذا الكلام تطورت علاقه عبدالعزيز بمتعب وصاروا كل يومين ثلاثه يطلعوون مع بعض..وفي يوم قرر عزوز انه يفاتح متعب بموضوع هنادي لأنه يخاف انها تتعلق فيه اكثر
وبنفس الوقت متعب ميت عليهاا
عزوز: اسمع.. بموضوع هنادي مع اني ادري انك ماتحب تتكلم فيه بس ودي اقول لك نصيحه
متعب: طيب قووول
عبدالعزيز: شوف انا اتوقع ان هنادي ماتدري انك تحبها لحد الحين ولا هي حاسه فييك لأنك اصلا ماتحااول تبين لها فا وش راايك انك تخطبها من اهلها !! وتكون الخطبه تطول لحد ماتخلص درااستك وتضبط وضعك 
متعب انصدم طبعاا ماتوقع ان عزوز يقول كذا
متعب: مدري وش اقول لك .. ماتوقعت الكلام هذا يطلع منك..
عزوز: انت ماعليك بس وش رايك؟؟
متعب: الموضووع يبي له تفكييير .. الزوااج مو لعبه
عزوز: ايه اكييد .. انا مابيك تقرر الحين انت خذ وقتك وفكر بالموضووع
متعب: طيب
-من يوم ماكلم عبدالعزيز متعب وهو مشغول بس يفكر بالكلام اللي قاله وانه معه حق بكل كلمه قالها له.. وراح يشااور اهله وهم بعد حمسوووه على هذا الشي بما انها بنت عمه وخلاص قرر انه يتزوجها
وامه كلمت ام هنادي وام هنادي كان عاجبها الموضوع بعد بما ان متعب مااينسمع عنه الى كل شي زيين.. ولما وصل لهنادي الخبر وانه بيجي يشوفها بالاول ماكان ودها بما انها لحد الحين تحب عبدالعزيز بس قوت على نفسها علشان تنسى حبه ووافقت انه يجي يشوفها..
وفي يوم الشوفه متعب محد قدة بالدنيا اخيرا بيشووف حبيبة قلبه وشوفه حلال وعلى رواااقه هع هع...
وتمت الشوفه وكانت هنادي مرره مرتااحه لمتعب وعجبتها فكرة الزواج وطبعا هنادي قالت لعزوز عن اللي صاار وهو بعد سمع السالفه كلها من متعب يعني شااف الموضوع من وجهة نظر كل الطرفين .. وكانوا كلهم مرتاحين ومستاانسين..
***
بعد مروور سنتين قرروا متعب وهنادي انهم يتزوجون وبهذا الوقت كانت هنادي تكلم عبدالعزيز بالنت بس مو زي اول .. يعني قلت سواليفهم لانه انشغلت بخطييبها مااهو كان يكلها 24 سااعه..
ويووم قرب يوم العرس قررت هنادي انها بتقطع علاقتها بعزوز لانها حست انها تخوون متعب مع عزوزز..
فبعد مااتكلم معااه وسولفوا وكل شي قالت له انها تبغى تقطع العلاقه اللي بينهم وقالت له انه المفروض يتفهم موقفها وتكلموا كثييير بالموضع بس بالاخير قال عزوز: اهم شي راحتك
ودمعت عيون هنادي لما قرت الكلام حست انها خلاااص ماراااح تشووفه مرره ثاانيه
او بالاحرى تتكلم معه..
وقاالوا مع السلاامه لبعض وسووت هنادي بلوووك لعزوووز..
***
مر يوم .. يومين .. اسبووع .. وصاار عبدالعزيز بس يفكر بهنادي وصار كل تفكيره فيها وبعد اسبووع جااه ارق ومااعرف كيف بينااام وبس وده يكلمها .. هناا استوعب انه يحبهاااااااااااااااا...
هذا الشي اللي ماااكااان ابدا متوقعه .. كيف يحبها وهو اللي تقريبا رتب زوجهااا ... كيف يحبها وهو اللي مبعدها عنه ورفضها لماا حااولت تبين له حبها كييف وكيييف وكييييف ....
اسأله داارت برااس عبدالعزيز وبغت تموووته ومااقدر يتحمل ودخل النت وطبعا هنادي كانت مسويه له بلووك .. فما قدر يكلمها وارسل لها ايميل..
" السلام عليكم يااهنوو .. وش اخباارك .. ان شاء الله تكونيين بخير
بس حبيت اسلم عليك واقوول لك كم كلمه بخااطري..
ساامحيني على كل غلط مني, اعذريني على كل غلط بدر مني, الا حبك فهو جزء مني .."

بعدها بيوم قرت هنادي الرساله وانفجعت .. وشكت ان الرساله جايتها بالغلط بس لما شافت اسمها تأكدت ان الرساله لها .. وقعدت تفكر كثيير وكاانت منقهره بنفس الوقت ليه يصدها والحين لما جت تتزوج يرسل لها الرساله ومابقى على زواجها الا 3 ايام..
ولما فكرت وفكرت بالموضوع قررت انها ماترد عليه وتخليه يذووق شوي من العذااب اللي ذاقه وهي بعد خلااص نست حبه ..
وفيه يوم الزوااج طبعا كان عزوز معزوم على العرس بما انه زواج عيال عمه .. وبعد منااوراات كثره بينه وبين نفسه قرر انه يحظر الزواج ..
وكانت من عادات العائله انهم يدخلون عيال العم على العروووسه وهي تكون متغطيه ويبااركون لها وفعلا دخلوا عليها وكان فيه عبدالعزيز معهم ولما دخل وسلم عليها قال لها مبرووك يالشيخه وكاان عبدالعزيز هو الوحيد اللي قد سمى هنادي بالشيخه .. فلما قالها استوعبت انه هو اللي بالنت اللي تعرفه ونزلت دمووع من عيونها واستوعبت بعد انه هو بعد عاارف انها تقرب له وكاانت صدمه قوويه عليها وقعدت تصيييح وتصييييح واهلها يحسبونها دموع الفرح ....!
النهايه ..!

القصه كلها من نسج خياااالي  حقووق الطبع محفووظه ل عـيـ الـمـهـا ـون

سبحان الله مايعرفون بعض وشف وشلون صارو قريبين

الله يعافيك قصه حلوه

هلاا بك مسطووووول

ومشكووور انك قرريت القصه

اسعدتني جداااا